இன்று நினைவேந்தல்!

தமிழ் இனத்தின் விடுதலைக்காகப் போராடி உயிர்த் தியாகம் செய்த மாவீரர்களை நினைவேந்தும் மாவீரர் நாள் இன்றாகும். இந்த நாளை உணர்வெழுச்சியுடன் கடைப்பிடிக்க தமிழர் தாயகம் தயாராகியுள்ளது. வடக்கு, கிழக்கில் இம்முறை சுமார் 30 மாவீரர் துயிலும் இல்லங்களில் பிரதானமாக அஞ்சலி நிகழ்வுகள் நடைபெறவுள்ளன.

தவிர, தனி மாவீரர் நினைவிடங்கள், உள்ளூராட்சி சபைகள், அரசியல் கட்சிகளின் பணிமனைகள் மற்றும் தனிநபர்களால் அமைக்கப்பட்ட மாவீரர் நினைவாலயங்களிலும் மாவீரர் நாளை கடைப்பிடிக்க ஏற்பாடாகியுள்ளது.

இந்த வருடம் வழக்கத்திலும் பார்க்க அதிகளவான இடங்களில் மாவீரர் நினைவேந்தல்கள் ஏற்பாடாகியுள்ள அதேசமயம், தமிழர் தாயகத்தின் முக்கிய நகரங்கள் மற்றும் பிரதேசங்கள் பலவும் சிவப்பு, மஞ்சள் வர்ண கொடிகளால் அலங்கரிக்கப்பட்டுள்ளன.

அத்துடன், மாவீரரை நினைவேந்தும் பதாகைகள், பொதுச் சின்னங்கள் என்பவையும் காட்சிப்படுத்தப்பட்டுள்ளன.

இன்று வழமைபோன்று 6.05 மணிக்கு ஆலயங்களில் மணியோசை எழுப்பப்பட துயிலும் இல்லங்கள், நினைவாலயங்கள், பொது இடங்கள், வீடுகளில் சமநேரத்தில் சுடர்கள் ஏற்றப்பட்டு மாவீரர்களுக்கு அஞ்சலி செலுத்தப்படும்.

யாழ்ப்பாணத்தில் கோப்பாய், கொடிகாமம், உடுப்பிட்டி – எள்ளங்குளம், வடமராட்சி கிழக்கு – உடுத்துறை, வேலணை – சாட்டி மாவீரர் துயிலும் இல்லங்களிலும், நல்லூர் உட்பட உள்ளூராட்சி சபைகளால் அமைக்கப்பட்ட மாவீரர் நினைவாலயங்களிலும் தியாகி திலீபன் நினைவுத் தூபி, உடுப்பிட்டியில் சங்கர், பண்டிதர் நினைவாக அமைக்கப்பட்ட நினைவிடம், தீருவில்,யாழ். பல்கலைக்கழக வளாகம் மற்றும் தமிழ்த் தேசிய அரசியல் கட்சிகளால் அமைக்கப்பட்ட நினைவிடங்களில் மாவீரர் நினைவேந்தல்கள் நடைபெறவுள்ளன.

கிளிநொச்சி மாவட்டத்தில் கனகபுரம், முழங்காவில் மாவீரர் துயிலும் இல்லங்களிலும் தனி மாவீரர் நினைவிடங்களிலும் தமிழ்த் தேசிய கட்சிகள் மற்றும் தனிநபர்களால் அமைக்கப்பட்ட நினைவாலயங்களில் மாவீரர் நினைவேந்தல் நடைபெறவுள்ளன.

முல்லைத்தீவு மாவட்டத்தில் விசுவமடு – தேராவில், முள்ளியவளை, ஆலங்குளம், இரணைப்பாலை, அளம்பில், வன்னிவிளான்குளம், முள்ளிவாய்க்கால், பச்சைப்புல்மோட்டை, கோடாலிக்கல்லு, மணலாறு (உதயபீடம்) துயிலும் இல்லங்களிலும் புதுக்குடியிருப்பு, முல்லைத்தீவு நகரம் எனப் பல்வேறு இடங்களிலும் அமைக்கப்பட்டுள்ள மாவீரர் நினைவாலயங்களிலும் நினைவேந்தல்கள் நடைபெறவுள்ளன.

மன்னார் மாவட்டத்தில் ஆட்காட்டிவெளி, பெரியபண்டிவிரிச்சான், முள்ளிக்குளம் துயிலும் இல்லங்களிலும் மாவீரர்களின் நினைவிடங்களிலும் நினைவேந்தல் முன்னெடுக்கப்படவுள்ளது.

இதேபோன்று, வவுனியாவில் ஈச்சங்குளம் துயிலும் இல்லத்திலும் வவுனியா நகரிலும் பிற இடங்களிலும் அமைக்கப்பட்டுள்ள மாவீரர் நினைவாலயங்களிலும்
நினைவேந்தல்கள் முன்னெடுக்கப்படவுள்ளன.

மட்டக்களப்பு மாவட்டத்தில் தரவை, கண்டலடி, மாவடி முன்மாரி, தாண்டியடி, துயிலும் இல்லங்களில் மற்றும் விசேடமாக அமைக்கப்பட்ட இடங்களில் மாவீரர் நினைவாலயங்களிலும் கிழக்கு பல்கலைக்கழகத்திலும் அஞ்சலிகள் நடைபெறவுள்ளன.

திருகோணமலையில் சம்பூர் – ஆலங்குளம் மற்றும் திருகோணமலை நகரம், கடற்கரை பகுதிகள் மற்றும் விசேடமாக அமைக்கப்பட்ட மாவீரர் நினைவிடங்களில் இம்முறை மாவீரர்கள் அஞ்சலிக்கப்படவுள்ளனர்.

அம்பாறை மாவட்டத்தில் கஞ்சிகுடிச்சாறு துயிலும் இல்லத்தில் நினைவேந்தல் முன்னெடுக்கப்படவுள்ளது.

அத்துடன், விசேடமாக அமைக்கப்பட்ட நினைவாலயங்களிலும் மாவீரர்கள் நினைவேந்தப்படவுள்ளனர்.

இது தவிர புலம்பெயர் தேசங்களிலும் தமிழர்கள் அதிகம் வாழும் பிரதேசங்களில் விசேடமாக அமைக்கப்பட்ட மாவீரர் நினைவாலயங்களில் நினைவேந்தல்கள்
முன்னெடுக்கப்படவுள்ளன.

தமிழீழ விடுதலைப் புலிகள் அமைப்பின் முதல் மாவீரரான லெப். சங்கர் (செல்வச்சந்திரன் சத்தியநாதன்) உயிர் நீத்த (1982) நவம்பர் 27ஆம் நாளில் அந்த அமைப்பின் சார்பில் மாவீரர்களானவர்கள் நினைவு கூரப்படுகிறார்கள். 1989ஆம் ஆண்டு முதல் கட்டமைக்கப்பட்ட நிகழ்வாக மாவீரர் நாள் தமிழ் மக்களால் கடைப்பிடிக்கப்படுகிறது.