பேரிடர்; இலங்கையில் பேரழிவு!

நாடு முழுவதும் நிலவும் சீரற்ற வானிலையால் பல்லாயிரக்கணக்கான மக்கள் பாதிக்கப்பட்டுள்ளனர். வடக்கில் முல்லைத்தீவு, மன்னார் நகர பகுதிகள் முழுமையாக
தொடர்புகளை இழந்துள்ளன.

இதேபோன்று வவுனியாவுடன் வடக்கு, தெற்குக்கான போக்குவரத்து வசதிகளும் முழுமையாக தடைப்பட்டுள்ளன.

இதனிடையே, தென்னிலங்கையில் 91 பிரதேச செயலர் பிரிவுகளுக்கு மண்சரிவு அபாய எச்சரிக்கை விடுக்கப்பட்டுள்ளது.

தொடரும் மழையால் ஆறுகள் பெருக்கெடுத்துள்ளன. இதனால், பல பிரதேசங்களும் வெள்ளக்காடாகியுள்ளன. நாடு முழுவதும் தொலைபேசி, இணைய வசதிகள் தடைப்பட்டமையால் பாதிக்கப்பட்டவர்களை மீட்பதும் அவர்களை உதவிகள் சென்றடைவதும் தடைப்பட்டுள்ளன.

முல்லைத்தீவில்

டித்வா புயல் பாதிப்பால் முல்லைத்தீவு மாவட்டம் பெரும்பாதிப்பை எதிர்கொண்டுள்ளது.

தொலைத்தொடர்பு தகவல்கள் முற்றாக செயலிழந்துள்ள நிலையில் காணப்படுகிறது. இதேநேரம், அரச கட்டமைப்பு, படை தரப்பு என்பன மக்களை மீட்கும் பணியில் ஈடுபடவில்லை என்று அங்கிருந்து கிடைக்கும் தகவல்கள் தெரிவித்தன.

வட்டுவாகல் பாலம் ஊடான போக்குவரத்து முற்றாக தடைப்பட்டுள்ளது. கிளிநொச்சியிலிருந்து – புதுக்குடியிருப்பு வரை பேருந்து சேவை நடைபெறுகிறது.

ஏ-35 வீதியில் மாணிக்கப்பிள்ளையார் கோவிலடி, மூங்கிலாறு, கைவேலி மஞ்சள் பாலம் பகுதிகள் வீதியை மூடிவெள்ளம் பாய்வதால் பேருந்துகள் போன்ற வாகனங்கள்
மட்டுமே பயணிக்கின்றன.

இதனிடையே, இருட்டுமடு, குரவில், ஆனந்தபுரம், மந்துவில், புதுக்குடியிருப்பு பகுதிகள் வெள்ளத்தில் மூழ்கியுள்ளன. புதுக்குடியிருப்பு – கேப்பாபிலவு வீதி கள்ளியடியுடன் வெள்ளத்தால் துண்டிக்கப்பட்டுள்ளது.

அத்துடன், ஒட்டுசுட்டான் – புதுக்குடியிருப்பு பாதைகளும் போக்குவரத்து தடைப்பட்டுள்ளன. இதேபோன்று, முள்ளியவளை – மாங்குளம், தண்ணீரூற்று – நெடுங்கேணி பகுதிகளுக்கான வீதிகளும் துண்டிக்கப்பட்டுள்ளன.

அம்பலவன்பொக்கணை, மாத்தளன் பகுதி மக்கள் வெள்ளத்தில் சிக்கிய நிலையில் இரணைப்பாலையை சேர்ந்த மக்களால் படகுகள் மூலம் மீட்கப்பட்டனர்.

இதேசமயம் பல இடங்களிலும் வெள்ளம் சூழ்ந்துள்ளமையால் மக்கள் பாதுகாப்பான இடங்களுக்கு செல்லமுடியாத நிலைமை காணப்படுகிறது.

வவுனியாவில்…

வவுனியாவில் தொடரும் அடைமழையால் பல இடங்களிலும் வெள்ளம் சூழ்ந்துள்ளது. அத்துடன், வர்த்தக நிலையங்கள், பாடசாலைகள், மதத் தலங்களுக்குள்ளும் வெள்ளம் புகுந்துள்ளது. கந்தசாமி நகர், பழைய மெனிக்பாம், கோதண்டர்நொச்சிக்குளம், பூம்புகார் ஆகிய இடங்களில் வெள்ளத்தில் அகப்பட்ட பல குடும்பங்கள் வெளியேற முடியாத நிலையில் காணப்படுகின்றன.

வவுனியா மாவட்டத்தின் பெரிய குளங்கள் உட்பட பல குளங்கள் உடைப்பெடுக்கும் அபாயத்தில் உள்ளன.

செட்டி குளம் உடைப்பெடுத்துள்ளது.

மன்னாரில்…

கடும் மழையால் மன்னார் நகரத்துடனான போக்குவரத்து பிரதான பாலத்துடன் முற்றாக துண்டிக்கப்பட்டுள்ளது. அத்துடன், பல கிராமங்களும் வெள்ளத்தில் மூழ்கியுள்ளன.

தொடர்ந்து பெய்துவரும் மழையால் மல்வத்து ஓயாவின் நீர்மட்டம் அதிகரித்துள்ளதால்
வெள்ளம் மேலும் அதிகரிக்கும் என்றும் மக்களை பாதுகாப்பான இடங்களுக்கு செல்லுமாறும் மாவட்ட அனர்த்த முகாமைத்துவ பிரிவு எச்சரித்துளளது. மடு, நானாட்டான், முசலி பிரதேச செயலர் பிரிவுகளை சேர்ந்த மக்களை விழிப்புடன் இருக்குமாறும் கேட்கப்பட்டுள்ளது.

காற்றின் வேகம் அதிகரித்திருப்பதால் கரையோர கிராம மக்கள் பாதிக்கப்பட்டுள்ளனர். விடத்தல் தீவு, தேவன்பிட்டி, அந்தோனியார்புரம் கிராமங்களில் கடல்நீரும் உட்புகுந்துள்ளது.

யாழ்ப்பாணத்தில்…

யாழ். மாவட்டத்தில் ஆயிரத்து 297 குடும்பங்களை சேர்ந்த 4 ஆயிரத்து 140 பேர் பாதிக்கப்பட்டுள்ளனர்.

ஒரு வீடு முழுமையாகவும் 85 வீடுகள் பகுதியளவிலும் சேதமடைந்துள்ளன. அத்துடன், 32 குடும்பங்களை சேர்ந்த 106 பேர் இடம்பெயர்ந்துள்ளனர் என்று மாவட்ட அரச அதிபர் அறிவித்துள்ளார்.

கிளிநொச்சியில்…

தொடர் மழையால் இரணைமடுக்குளத்தின் வால்கட்டு வெட்டிப்பட்டு நீர் வெளியேற்றப்பட்டுள்ளது. 36 அடி கொள்ளளவு கொண்ட இந்தக் குளம் 36 அடியை எட்டியுள்ளது. இதனால், இராமநாதபுரம், வட்டக்கச்சி, மாயவனூர் பகுதிகளின் மக்களை விழிப்புடன் இருக்குமாறு எச்சரிக்கப்பட்டுள்ளது. பல தாழ்நிலங்களிலும் வெள்ளம் ஏற்பட்டுள்ளது.

கிழக்கில்…

கிழக்கு மாகாணத்தில் பல இடங்களிலும் மழை குறைவடைந்துள்ளது. எனினும், வெள்ளப்பாதிப்பு இன்னமும் முற்றாக நீங்கவில்லை. இதனிடையே, திருகோணமலை மாவட்டத்தில் அடுத்த 36 மணி நேரத்துக்கு 150 மி.மீற்றர் வரையான மழைவீழ்ச்சி கிடைக்கப்பெறும் என்று எதிர்வு கூறப்பட்டுள்ளது.

தென்னிலங்கையில்….

தென்னிலங்கையில் தொடரும் மழைக் காலநிலையால் தென்னிலங்கையின் 91 பிரதேச செயலர் பிரிவுகளுக்கு மண்சரிவு எச்சரிக்கை விடுக்கப்பட்டுள்ளது.

அத்துடன், ஆறுகளை அண்டியுள்ள பல பகுதிகளுக்கும் வெள்ள அபாய எச்சரிக்கை விடுக்கப்பட்டுள்ளது.

பதுளை, கொழும்பு, கம்பஹா, களுத்துறை, கண்டி, கேகாலை, குருநாகல், மாத்தளை, மொனராகலை, நுவரெலியா, இரத்தினபுரி மாவட்டங்களுக்கே நிலச்சரிவு அபாய எச்சரிக்கை விடுக்கப்பட்டுள்ளது. அங்குள்ள மக்களை பாதுகாப்பான இடங்களுக்கு இடம்பெயருமாறும் அறிவிக்கப்பட்டுள்ளது.

இதேசமயம், களனி கங்கை பெருக்கெடுத்துள்ளமையால் கொழும்பு, வத்தளை பகுதிகளில் வெள்ளம் வேகமாக அதிகரித்து வருகிறது. இதனால், அபாய எச்சரிக்கை வலயத்திலுள்ளவர்களை பாதுகாப்பான இடங்களுக்கு இடம்பெயர அறிவுறுத்தப்பட்டது.

இதேபோன்று கம்பஹாவின் அத்தனகல்லாறு பெருக்கெடுத்துள்ளது. இதனிடையே, இரத்தினபுரி மாவட்டத்தில் இரத்தினபுரி, எலபாத்த,பெல்மதுளை, காவத்தை, எஹேலியகொடை, காவத்தை,கிரியெல்ல குருவிட்ட உள்ளிட்ட வெள்ளம் மற்றும் மண்சரிவு காரணமாக சுமார் ஆயிரம் குடும்பங்களுக்கு மேல் பாதிக்கப்பட்டுள்ளனர். களுகங்கையின் நீர் மட்டம் 24 அடிக்கு மேல் உயர்ந்துள்ளது. இதனால், இரத்தினபுரி நகரின் பெரும்பகுதி வெள்ளத்தில் மூழ்கியுள்ளது. அத்துடன், அங்குள்ள சிவாலயமும் வெள்ளத்தில் மூழ்கியுள்ளது.